Anand Narayan Mulla
hava na-sazgar-e-gulsitan ma.alum hoti hai
agar hansti bhi hain kaliyan fughan ma.alum hoti hain
ḳhushi men apni ḳhush-baḳhti kahan ma.alum hoti hai
qafas men ja ke qadr-e-ashiyan ma.alum hoti hai
har ik ke zarf ki vus.at yahan ma.alum hoti hai
mohabbat aadmi ka imtihan ma.alum hoti hai
kabhi shayad mohabbat ka koi hasil nikal aa.e
abhi to ra.egan hi ra.egan ma.alum hoti hai
ye dil ko kar diya kaisa kisi ki kam-nigahi ne
zara si phans chubhti hai sinan ma.alum hoti hai
khinch aati hain isi sahil pe ḳhud do ajnabi maujen
mohabbat ek jazb-e-be-aman ma.alum hoti hai
ufuq hi par abhi tak hain tasavvur ki hasin shamen
kahin Thahri hui umr-e-ravan ma.alum hoti hain
tum is halat ko kya jaano na jaano hi to achchha hai
hansi jab aa ke honTon par fughan ma.alum hoti hai
tiri be-mehriyan aḳhir vo nazuk vaqt le aa.en
ki apnon ki mohabbat bhi garan ma.alum hoti hai
nazar aata nahin shabnam ka girna phuul ka khilna
mohabbat ki haqiqat na-gahan ma.alum hoti hai
chaman ka dard hai jis dil men to chahe kahin uTThe
use apni hi shaḳh-e-ashiyan ma.alum hoti hai
nazar phirti thi vo pahle bhi lekin yuun na phirti thi
kuchh ab ki ḳhatm hoti dastan ma.alum hoti hai
abhi ḳhakistar-e-‘mulla’ se uThta hai dhuan kuchh kuchh
kahin par koi chingari tapan ma.alum hoti hai
Leave a Reply