kuchh soch ke parvana mahfil men jala hoga
shayad isi marne men jiine ka maza hoga
har sa.i-e-sitam par aansu nikal aa.e hain
anjam-e-tarab-koshi kya janiye kya hoga
gumrah-e-mohabbat huun puchho na miri manzil
har naqsh-e-qadam mera manzil ka pata hoga
kya tera mudava ho dard-e-shab-e-tanha.i
chup rahiye to barbadi kahiye to gila hoga
katra ke to jaate ho divane ke raste se
divana lipaT jaa.e qadmon se to kya hoga
maiḳhane se masjid tak milte hain nuqush-e-pa
ya shaiḳh ga.e honge ya rind gaya hoga
farzanon ka kya kahna har baat pe laḌte hain
divane se divana shayad hi laḌa hoga
rindon ko ‘hafiz’ itna samjha de koi ja kar
aapas men laḌoge tum vaa.iz ka bhala hoga
Leave a Reply