Dattatriya Kaifi
lab-e-saghar se sun lo zahido taqrir-e-mai-ḳhana
shikast-e-tauba hi hai ya na.i ta.amir-e-mai-ḳhana
azal se us pe rahmat hai abad tak us pe rahmat ho
raqam hai ḳhatt-e-jam-e-bada men taqdir-e-mai-ḳhana
to kya ai zahid-e-ḳhushk us ki azmat jaan sakta hai
qalam se mauj-e-kausar ke khichi tasvir-e-mai-ḳhana
ye mai-sajjada rangin-kun garat pir-e-mughan goyad
ki dana-e-rumuz-e-do-jahan hai pir-e-mai-ḳhana
mila paoge is ka silsila tasnim-o-kausar se
bahut tul-o-tavil ai shaiḳh hai zanjir-e-mai-ḳhana
bana hai shisha-e-mai sar-ba-sar a.ina-e-mahshar
bari zohd-o-riya se hai javan-e-pir-e-mai-ḳhana
tu saari umr ab matha ragaḌta rah kaḌa ke kar
na Taale se Tale ai shaiḳh ye ta.azir-e-mai-ḳhana
daha.i saqi-e-kausar ki ye hain nafs ke bande
jo vasl-e-hur ki ḳhatir karen tahqir-e-mai-ḳhana
habab-e-ḳhat-e-jam-o-qulqul-e-mina se sabit hai
vo hai tasbih-e-mai-ḳhana ye hai takbir-e-mai-ḳhana
gira jo ḳhisht-e-ḳhum par sar lab-e-kausar ne chuma hai
ki hai taqsir-e-mai-ḳhana hi men tauqir-e-mai-ḳhana
na kyuun har qatra-e-mai mehr ki ankhon ka taara ho
ki barq-e-tur ki hai ik chamak tanvir-e-mai-ḳhana
paḌi hai ik nazar jis par vo be-ḳhud ho gaya ‘kaifi’
nigah-e-mast-e-saqi men hai kya tasir-e-mai-ḳhana
Leave a Reply