Nazeer Qaisar
miTTi pe koi naqsh bhi ubhra na rahega
gir ja.egi divar to saaya na rahega
aa.ega nazar dhuup men chhat par vo khule sar
galiyon men ye raton ka nikalna na rahega
shaḳhon se numu patton se chhin ja.egi ḳhushbu
kaT ja.ega jab peḌ to kya kya na rahega
sochun to koi lafz milega na tire naam
likkhunga to kaghaz koi saada na rahega
bikhre hue chehron men khaḌa soch raha huun
ankhen na rahengi ki tamasha na rahega
miT ja.unga likhte hue rudad shab-o-roz
jab main na rahunga mira afsana rahega
kho ja.egi ḳhamoshi men avaz-e-jaras bhi
rahon men kahin naqsh-e-kaf-e-pa na rahega
aage bhi dikha.i nahin degi koi manzil
aur ghar ko palaTne ka bhi rasta na rahega
main harf huun likh lo mujhe avaz huun sun lo
aate hain vo din jab koi mujh sa na rahega
Leave a Reply