gila to aap se hai aur be-sabab bhi nahin
magar irada-e-iz.har zer-e-lab bhi nahin
main chahta huun ki apni zaban se kuchh na kahun
main saf-go huun magar itna be-adab bhi nahin
jafa ki tarah mujhe tark-e-dosti bhi qubul
malal jab bhi na tha mujh ko aur ab bhi nahin
guzar gaya vo talabgariyon ka daur ba-ḳhair
ḳhuda ka shukr hai kab fursat-talab bhi nahin
mizaj-e-vaqt se tang aa chuka hai mera zamir
mire usuul badal jaa.en to ajab bhi nahin
ga.e dinon ka fasana hai ab hamara vajud
vo muflisi bhi nahin hai vo roz-o-shab bhi nahin
javab dunga main kuchh mujh se puchh kar dekho
abhi main hosh men huun aisa jan-ba-lab bhi nahin
hasab-nasab ki jo puchho to shajara pesh karun
ḳhitab koi nahin hai mira laqab bhi nahin
Leave a Reply