hazar hadsat-e-gham ravan-davan liye hue
kahan chali hai zindagi kashan kashan liye hue
mire nasib ki ye zulmaten na miT sakin kabhi
koi guzar gaya hazar kahkashan liye hue
ye zindagi badalte mausamon ka rang-rup hai
kabhi bahar ka saman kabhi ḳhizan liye hue
mira ye karb hai ki mera karvan guzar gaya
simaT ke rah gaya huun gard-e-karvan liye hue
agar vo jan-e-arzu mile to us ki nazr ho
khaḌa huun kab se muntazir main naqd-e-jan liye hue
mire vaqar ka saval tha main kuchh na kah saka
guzar ga.e vo rahaton ka ik jahan liye hue
kisi bhi zaviye se ‘arsh’ is ko dekhiye magar
qadam qadam pe zindagi hai imtihan liye hue
Leave a Reply