Nazish Partap Gadhi
kuchh duur saath gardish-e-sham-o-sahar ga.i
phir us ke ba.ad zindagi jaane kidhar ga.i
apnon ki bevafa.i baḌa kaam kar ga.i
is aag men hayat tapi aur nikhar ga.i
bedari-e-bahar-e-nazar hi ki der thi
phir jo bhi chiiz samne aa.i sanvar ga.i
ab kosta huun puḳhtagi-e-tajrabat ko
jo mujh ko har aziiz se begana kar ga.i
allah re junun-e-tajassus ke marhale
meri nigah tujh pe bhi ho kar guzar ga.i
us par nazar uTha ke main ‘nazish’ jo ruk gaya
mahsus ho raha hai ki duniya Thahar ga.i
Leave a Reply