charagh-e-ḳhana-e-dil ko supurd-e-bad kar duun
ye qaidi bhi kisi ke naam par azad kar duun
bahut ham se gurezan ye zamin o asman hain
ijazat ho to ik duniya na.i abad kar duun
jidhar niklun savad-e-hijr hi ka samna hai
koi surat yahan bhi vasl ki ijad kar duun
mire mayus rahne par agar vo shadman hai
to kyuun ḳhud ko main us ke vaste barbad kar duun
bahut chehre nigahon men ubharte Dubte hain
agar kuchh der ko raushan charagh-e-yad kar duun
bahut din se musir is baat par vo mehrban hai
ki main dil ko rahin-e-sohbat-e-na-shad kar duun
Leave a Reply