Nushur Wahidi
vaqt ka qafila aata hai guzar jaata hai
aadmi apni hi manzil men Thahar jaata hai
ek bigḌi hui qismat pe na hansna ai dost
jaane kis vaqt ye insan sanvar jaata hai
is taraf aish ki sham.en to udhar dil ke charagh
dekhna ye hai ki parvana kidhar jaata hai
jam-o-sahba ki mujhe fikr nahin ai gham-e-dil
mera paimana to ashkon hi se bhar jaata hai
ek rishta bhi mohabbat ka agar TuuT gaya
dekhte dekhte shiraza bikhar jaata hai
haal mere liye hai lamha-e-a.inda ‘nushur’
vaqt sha.er ke liye pahle guzar jaata hai
Leave a Reply