kis e’timad se ilzam dhar ga.e apne
hamare naam ko badnam kar ga.e apne
ab un ke naqsh-e-qadam raston men kya DhunDen
para.i manzilon ko ham-safar ga.e apne
bahar ne kiya mansuba-e-hina-bandi
manao jashn ki sab zaḳhm bhar ga.e apne
phir us ke ba.ad faqat main tha mera saaya tha
jo dasht dasht the ham-rah ghar ga.e apne
jab ek miir bhi ham-sa.e men mire roya
to ye guman hua divar-o-dar ga.e apne
hamen adu se ho ‘mohsin’ gila to kyunkar ho
hamare shahr ko viran kar ga.e apne
Leave a Reply