jiit baḳhshe jo charaghon ko hava zindabad
us pe qurban charaghon ki ziya zindabad
main ne dushman ko maharat pe koi daad na di
mere andar se koi bol paḌa zindabad
us mohabbat ke payambar se taqabul kaisa
dasht sau baar jise kahta raha zindabad
ghar ka malik to mire zabt pe ta.ana-zan tha
ghar ki divar ne par mujh se kaha zindabad
jo tire jism ke auraq paḌha karti hai
rashk-e-ḳhushbu hai vo be-misl qaba zindabad
bazm-e-yaran men mire fan pe hai ungli uTThi
phir miri fikr pe bohtan laga zindabad
mar gaya bhuuk se par bhiik ka luqma na liya
marne vaale tire kirdar-o-ana zindabad
faisla mera shu.uri to nahin ho sakta
jis ko thi maat hui us ko likha zindabad
kar le manzur sana-ḳhvani-e-‘kazim’ ko husain
tu bhi zinda hai tiri karb-o-bala zindabad
Leave a Reply