Faiz Khalilabadi
tamam husn-o-ma.ani ka rang uḌne laga
khili jo dhuup to paani ka rang uḌne laga
ishara karti hain chehre ki jhurriyan chup-chap
to kya badan se javani ka rang uḌne laga
jadid rang men aaya jo misra-e-ula
hasad se misra-e-sani ka rang uḌne laga
kitab-e-zist ke mafhum ko samajhte hi
yahan baḌe baḌe gyani ka rang uḌne laga
jo da.imi tha vahi rah gaya hai zehnon men
jo aarzi tha kahani ka rang uḌne laga
miri nazar se mili ‘faiz’ jab nazar us ki
to mere dushman-e-jani ka rang uḌne laga
Leave a Reply