bashinde haqiqat men hain ham mulk-e-baqa ke
kuchh rose se mehman hain is dar-e-fana ke
dil khuun ho shab-e-vasl bhi hasrat men na kyun-kar
dekhen na vo khalvat men bhi jab aankh utha ke
farmaiye ham se thi yahi shart-e-mohabbat
khuub aap ne rusva kiya ghairon men bula ke
kuche men na aae koi main jaan gaya huun
farmate ho mujh se ye raqibon ko suna ke
dil haath se kho jaata hai kis taur se zahid
to aap zara dekh le us kuche men ja ke
khak-e-dar-e-janan hai libas-e-tan-e-uryan
ashiq tire mohtaj nahin aur qaba ke
ham sar ke bal aenge jo bulvaoge sahab
gar ho na yaqin dekh lo tum chaho bula ke
ho saya-e-divar tumhara jo mayassar
phir kya karen farmaiye saae ko huma ke
dil khol ke kar lijiye ai hazrat-e-dil sair
ham phir ke na phir aenge is bazm se ja ke
tan khaak men mil jaega ik rose hamara
ji tan se nikal jaega manind hava ke
Leave a Reply