duur tak sabza kahin hai aur na koi sa.eban
zer-e-pa tapti zamin hai sar pe jalta asman
jaise do mulkon ko ik sarhad alag karti hui
vaqt ne ḳhat aisa khincha mere us ke darmiyan
ab ke sailab-e-bala sab kuchh baha kar le gaya
ab na ḳhvabon ke jazire hain na dil ki kashtiyan
lutf un ka ab hua to hai magar kuchh is tarah
jaise sahra se guzar jaa.e koi abr-e-ravan
munhasir hai aisi ik buniyad par us ka yaqin
jis tarah dosh-e-hava par koi tinkon ka makan
be-zabanon se ḳhamoshi ka gila kaisa ki jab
so ga.e lafzon ki chadar taan kar ahl-e-zaban
ye safar kaisa hai ‘mohsin’ jitna baḌhte ja.iye
baḌhti jaa.en utni hi manzil-ba-manzil duriyan
Leave a Reply