Ghani Ejaz
aap apne ko mo’atabar kar len
milne valon ke dil men ghar kar len
zindagani ke din jo thoḌe hain
kyuun na hans bol kar basar kar len
chun rahe hain jo aib auron ke
apne daman pe bhi nazar kar len
kaun deta hai saath mushkil men
hauslon hi ko ham-safar kar len
chahiye kuchh sukun duniya men
ḳhvahishen apni muḳhtasar kar len
baat pahunche kisi tarah un tak
ham sitaron ko nama-bar kar len
jangalon se hamen guzarna hai
pahle sanpon ko be-zarar kar len
chaliye jadugaron ki basti men
apne aibon ko bhi hunar kar len
aao dukh dard baanT len ‘ejaz’
ranj-o-gham ko idhar-udhar kar len
Leave a Reply