Liaqat Jafri
raunaq-e-daman-e-sad-chak kahan se laa.en
shahr men dasht ki poshak kahan se laa.en
halat-e-jazb men idrak kahan se laa.en
zahr ke vaste tiryak kahan se laa.en
gard-ha-e-ḳhas-o-ḳhashak kahan se laa.en
is qadar gardish-e-aflak kahan se laa.en
paani le aa.e hain ab ek na.i uljhan hai
kuza-gar tere liye ḳhaak kahan se laa.en
chehra-mohra to bahar-hal damak hi lega
tabish-e-chashma-e-nam-nak kahan se laa.en
tujh ko bilkul nahin ehsas-e-hunar ai dariya
ab tire vaste tairak kahan se laa.en
ḳhak-zade hain so bas ek hi rangat hai nasib
ḳhud men sad-rangi-e-aflak kahan se laa.en
ham bhi ji bhar ke tujhe koste phirte lekin
ham tira lahja-e-be-bak kahan se laa.en
Leave a Reply