Dattatriya Kaifi
aah vo sho.ala hai jo ji ko bujha ke uTThe
dard vo fitna hai jo dil ko biTha ke uTThe
aap ki yaad men ham ai sanam-e-ghaflat-kesh
aise baiThe ki qayamat hi uTha ke uTThe
ek duzdida-nazar se mira dil chhin ke vaah
tum kidhar ko miri jaan aankh bacha ke uTThe
arsa-e-hashr tak ik lag gaya tanta un ka
murde qabron se jo tere shohda ke uTThe
ramazan kyunki baras-bhar ko samajh baiThen ham
aa.e din ke bhi kisi se ye kaḌake uTThe
dil-nashin rahmat-e-haq jab se hui hai ‘kaifi’
daghdaghe dil se mire roz-e-jaza ke uTThe
Leave a Reply