Sher Afzal Jafri
vaqt afaq ke jangal ka javan chita hai
meri duniya ke ghazalon ka lahu piita hai
ishq ne mar ke svayamvar men use jiita hai
dil siri-ram hai dilbar ki raza siita hai
ab bhi ghanshyam hai is dasht ka buuTa buuTa
barg ne aaj bhi insan ke liye giita hai
jagmagati rahi ashkon se shab-e-tar-e-hayat
dip-mala ki tarah daur-e-alam biita hai
koi lahka jo sar-e-dar to yazdan ne kaha
ibn-e-adam ne mah-o-sal ka ran jiita hai
tujhe sajdon ke evaz mil na saki ruh-e-bashar
ham ne sar de ke ḳhuda.i ka bharam jiita hai
Leave a Reply