na sunti hai na kahna chahti hai
hava ik raaz rahna chahti hai
na jaane kya sama.i hai ki ab ki
nadi har samt bahna chahti hai
sulagti raah bhi vahshat ne chun li
safar bhi pa-barahna chahti hai
ta.alluq ki ajab divangi hai
ab us ke dukh bhi sahna chahti hai
ujale ki duaon ki chamak bhi
charagh-e-shab men rahna chahti hai
bhanvar men andhiyon men badban men
hava masruf rahna chahti hai
Leave a Reply