Aankh Imkan Se Bhari Hui Thi

aañkh imkān se bharī huī thī

aur maiñ ḳhvāb meñ Darī huī thī

zaḳhm gintī thiiñ uñgliyāñ apne

koshish-e-ā.īna-gari huī thī

hijr kyā ḳhuub kaifiyat laayā

in dinoñ kitnī shā.erī huī thī

kyā isī meñ hī ishq pinhāñ thā

ik nigah vo bhī sarsarī huī thī

kaisā mahsūs ho rahā thā tumheñ

jab madīne meñ hāzirī huī thī

us ne āñkhoñ meñ baat kī mujh se

ḳhāmushī hoñT par dharī huī thī

sabz titlī thī ‘rāshida’ māhīn

nargisī phuul par marī huī thī

Leave a Comment