Rashida Maheen Malik
aankh imkan se bhari hui thi
aur main ḳhvab men Dari hui thi
zaḳhm ginti thiin ungliyan apne
koshish-e-a.ina-gari hui thi
hijr kya ḳhuub kaifiyat laaya
in dinon kitni sha.eri hui thi
kya isi men hi ishq pinhan tha
ik nigah vo bhi sarsari hui thi
kaisa mahsus ho raha tha tumhen
jab madine men haziri hui thi
us ne ankhon men baat ki mujh se
ḳhamushi honT par dhari hui thi
sabz titli thi ‘rashida’ mahin
nargisi phuul par mari hui thi
Leave a Reply