kuchh bholi aur kuchh tikhi avazen hain
jaise chehre hain vaisi avazen hain
ik tathir se aari jism ka pursa hain
ḳhauf men lipTi jitni bhi avazen hain
charon-janib ghor andhera hai jis men
aThon janib sunne ki avazen hain
aisa mahv huun ḳhamoshi ko sunne men
maano mujh se pahle ki avazen hain
ghuur raha huun kanon ki virani ko
chiḳh raha huun kya gungi avazen hain
itni vahshat taari hui ki bhuul ga.e
ye to apni imdadi avazen hain
chaunk raha huun mere viran kamre men
koi nahin hai phir kaisi avazen hain
avazon ka jamna is se sabit hai
jaise ham ḳhamoshi ki avazen hain
dost hamare paas izafi kuchh bhi nahin
marti siskiyan hain dabti avazen hain
Leave a Reply