Daman Ki Panahon Se Mukar Kyon Nahin Jate

dāman kī panāhoñ se mukar kyoñ nahīñ jaate

aañsū mirī palkoñ pe Thahar kyoñ nahīñ jaate

ham log azal se haiñ asīr-e-shab-e-zulmat

tum chāñd ho to chāñd-nagar kyoñ nahīñ jaate

bachchoñ ke masā.il haiñ mahājan ke taqāze

ye ham hī samajhte haiñ ki ghar kyoñ nahīñ jaate

kyoñ karte ho iqrār bhī inkār kī sūrat

auroñ kī tarah saaf mukar kyoñ nahīñ jaate

maanā ki har ik moḌ pe bātil kī hai dīvār

tum rāh-e-haqīqat se guzar kyoñ nahīñ jaate

chalnā hai agar apne hī pairoñ pe tumheñ ‘shān’

tum vaqt ke kāñdhe se utar kyoñ nahīñ jaate

Leave a Comment