ek din vasl se apne mujhe tum shaad karo
phir miri jaan jo kuchh chaho so be-dad karo
gar kisi ghair ko farmaoge tab janoge
ve hamin hain ki baja laven jo irshad karo
ab to viran kiye jaate ho tarab-ḳhana-e-dil
aah kya jaane kab aa phir ise abad karo
yaad men us qad o ruḳhsar ke ai gham-zadagan
ja ke tuk baagh men sair-e-gul-o-shamshad karo
le ke dil chaho ki phir deve vo dilbar maalum
kaise hi naala karo kaisi hi fariyad karo
surma-e-dida-e-ushshaq hai ye ai ḳhuban
apne kuche se miri ḳhaak na barbad karo
dekh kar ta.ir-e-dil aap ko bhula parvaz
ḳhvah paband karo ḳhvah use azad karo
aap ki chaah se chahen hain mujhe sab varna
kaun phir yaad kare tum na agar yaad karo
sham-e-afroḳhta jab bazm men dekho yaaro
hal-e-‘bedar’-e-jigar-soḳhta vaan yaad karo