Rahil Bukhari
dar-o-divar par saaya paḌa hai
havaon men nami ka za.iqa hai
koi tufan hai kachcha ghaḌa hai
nigah-e-shauq manzil-ashna hai
vahi kunj-e-qafas hai aur ham hain
vahi ummid ka jalta diya hai
main a.ine men ḳhud ko khojta huun
ye gaanv kab ka ḳhali ho chuka hai
december ki kahani aur kuchh thi
mire dil ka ujaḌna hadisa hai
gham-e-uqba gham-e-dauran gham-e-dil
hamen kitna banaya ja raha hai
yahan insan bo.e ja rahe hain
ye jangal is liye kaaTa gaya hai
qabila qafila qaidi qataren
ye manzar shaam tak phaila hua hai
ye rasta duur tak jaata hai ‘rahil’
hamen pichhe bhi muḌ kar dekhna hai
Leave a Reply