Na Us Ka Batin-O-Zahir Badalne Wala Hai

na us kā batin-o-zāhir badalne vaalā hai

mafād dekh ke mehvar badalne vaalā hai

adālatoñ ke ravayyoñ pe mat qayāfa kar

ye kaun kahtā hai manzar badalne vaalā hai

falak pe chāñd sitāre haiñ saañs roke hue

libās aaj vo paikar badalne vaalā hai

jo kah diyā hai bas us par hanūz qaa.em haiñ

na vo na maiñ na samundar badalne vaalā hai

mujh ek fard meñ tāqat hai saare lashkar kī

sipah-salār to lashkar badalne vaalā hai

dhiyān do na ye hai chaal mere dushman kī

ġhalat ye soch ki ‘safdar’ badalne vaalā hai

Leave a Comment