Shaukat Wasti
ajiib baat hai din bhar ke ehtimam ke ba.ad
charagh ek bhi raushan hua na shaam ke ba.ad
suna.un main kise rudad-e-shahr-e-na-pursan
ki ajnabi huun yahan muddaton qayam ke ba.ad
ḳhirad aliil thi daur-e-sharab se pahle
qadam men aa.i thi laghzish shikast-e-jam ke ba.ad
sitam-zarifi-e-tariḳh hai ki masnad-gir
sada ḳhavas hue inqalab-e-am ke ba.ad
habab soch ke kya ham-rikab-e-mauj hua
ki baiTh jaana tha jab ek aadh gaam ke ba.ad
rahe charagh dariche men dar khula rakhna
musafir aan nikalte hain ba.az shaam ke ba.ad
kabhi kabhi to ho ‘shaukat’ shadid ye ehsas
ki ham tuyur qafas men paḌe hain daam ke ba.ad
Leave a Reply