Ghulam Mohammad Qasir
zehn men da.ere se banata raha duur hi duur se muskurata raha
main samundar nahin chand ko ilm hai raat bhar phir bhi mujh ko bulata raha
aankh men ḳhema-zan nil-gun vus.aten apna pahla qadam hi ḳhalaon men hai
jo jafa ke jazira-numaon men hai dil ka us ḳhak-e-ḳhasta se naata raha
kaj-ada.i ki chadar se munh Dhanp kar sone vaala sar-e-sham hi so gaya
ḳhushk yadon ke patton bhare khet men saanp sa raat bhar sarsarata raha
der tak zard andhi si chalti rahi saans bujhti rahi sham.a jalti rahi
jaan pighalti rahi raat Dhalti rahi main na ruTha magar vo manata raha
an-suni si sadaon ke ghere men tha dekhte dekhte ghup andhere men tha
vo mujhe pa ke duniya ke baḳhshe hue sab ke sab khoTe sikke chalata raha
azma.ish men hai vo ghaḌi iid ki chand ne jis ke aane ki ta.id ki
ik phaTe pairahan par pasine ki tah ek ghar ḳhushbuon men nahata raha
Leave a Reply