kaise har dard ko siine men chhupa.e rakkhen
aur honTon pe tabassum ko saja.e rakkhen
jo the apne vo zamana hua sab chhoḌ ga.e
kab talak bazm ko ghairon se saja.e rakkhen
ye suna hai ki vahan der hai andher nahin
to chalo bahr-e-dua haath uTha.e rakkhen
jab ye chhaT ja.enge badal to kiran phuTegi
sham.a ummid ki ik ham bhi jala.e rakkhen
yuun to bhule se bhi ab yaan na koi aa.ega
ehtiyatan hi magar ghar ko saja.e rakkhen
dil men soi hui chingari ne karvaT li hai
ab to is aag se daman ko bacha.e rakkhen
hoga ‘nik.hat’ se mo.attar ye chaman bhi ik roz
bas tiri yaad ke paudon ko laga.e rakkhen
Leave a Reply