tumhen jo mere gham-e-dil se agahi ho jaa.e
jigar men phuul khilen aankh shabnami ho jaa.e
ajal bhi us ki bulandi ko chhu nahin sakti
vo zindagi jise ehsas-e-zindagi ho jaa.e
yahi hai dil ki halakat yahi hai ishq ki maut
nigah-e-dost pe iz.har-e-bekasi ho jaa.e
zamana dost hai kis kis ko yaad rakkhoge
ḳhuda kare ki tumhen mujh se dushmani ho jaa.e
siyah-ḳhana-e-dil men hai zulmaton ka hujum
charagh-e-shauq jalao ki raushni ho jaa.e
tulu-e-sub.h pe hoti hai aur bhi namnak
vo aankh jis ki sitaron se dosti ho jaa.e
ajal ki god men ‘qabil’ hui hai umr tamam
ajab nahin jo miri maut zindagi ho jaa.e
Leave a Reply