jaan ka azar hai bimari-e-duniya nahin
zaat tak mahdud ho jaa.en to kuchh ḳhatra nahin
ab hifazat jitni hai mahbus ho jaane men hai
ḳhud ke bahar ghumne phirne ka ab mauqa nahin
us se milna absharon se guzarna tha magar
ḳhauf ka vo kaun sa tufan tha jo aaya nahin
ab ke bichhḌe kab milenge ab ki baar ik ye saval
ham ne bhi puchha nahin us ne bhi batlaya nahin
mo’atabar kitna bhi ho har vasta mashkuk hai
jo tasavvur men likha vo ḳhat bhi pahunchaya nahin
mujh men ik bachcha jo muzmar hai bahut masrur hai
in dinon duniya se us ka mutlaqan rishta nahin
mas.ala koi bhi ho ‘arshad’ muhit-e-ishq hai
jo ghazal ka rah-rau ho raah se haTta nahin
Leave a Reply