ik khula maidan tamasha-gah ke us paar hai
jis men har raqqas ka ik aa.ina tayyar hai
ret ke zariye hamari manzilen aur un ki ham
pas yahan samt-e-safar ka janna be-kar hai
raat aur tufan-e-abr-o-bad mere har taraf
duur lau deti hui ik mash.al-e-ruḳhsar hai
phir kabhi uTThe to mil lenge na itne dukh uTha
maut se hota hua ik rasta hamvar hai
is tarah bab-e-nasihat khol kar baiThe hain log
jaise ḳhair o shar ka duniya men koi me.aar hai
lahr vo aa.i ki ham hain aur nasheb-e-gumrahi
gham ke aage band ab ke bandhna dushvar hai
silsila avaz ka dekho ki ḳhoshe sarsara.e
phir khanak hai dhaat ki phir saanp ki phunkar hai
Leave a Reply