mahfil men to bas vo saj raha hai
apne ko jo kuchh samajh raha hai
dastak tire haath ki hai lekin
darvaza hava se baj raha hai
nikla tha main ghar se munh-andhere
ab raat ka ek baj raha hai
phir ḳhud ko dikha.i de gaya huun
phir soch ka taar ulajh raha hai
is daur ka hai vahi payambar
jo apne huquq taj raha hai
kya ho jo kahin baras paḌe vo
ab tak jo faqat garaj raha hai
itna bhi nahin huun main to ‘rashid’
jitna mujhe vo samajh raha hai
Leave a Reply