Ahmad Ali Barqi Azmi
na aae kaam kisi ke jo zindagi kya hai
bashar-navaz na ho jo vo aadmi kya hai
zamana-saz hain jo vo hain maslahat-andesh
jo ho khulus se aari vo dosti kya hai
pas-az-vafat na len jis ka naam us ke aziiz
tavangari hai agar ye to muflisi kya hai
karo na dast-darazi khuda ke bandon par
hai naam us ka shujaat to buzdili kya hai
haqiqi dosti vo hai ho jis men josh-o-kharosh
nashat-e-ruh na ho jis men khush-dili kya hai
aziz-tar hain mujhe khud se bhi hasan-chishti
bataun aap ko kya banda-parvari kya hai
na ho jo qari-o-samea pe kuchh asar-andaz
fareb mahz hai ‘barqi’ vo shairi kya hai
Leave a Reply