Ea C A Faf
vaqt ke hathon hikayat-e-ana bhuul ga.e
ham vafa bhuul ga.e aap jafa bhuul ga.e
kis ko samjha.en ye samjhane ki baten kab hain
vasl kab yaad raha hijr men kya bhuul ga.e
kya chaman chhoḌa palaT kar nahin dekha us ko
rang-e-gul bu-e-saman bad-e-saba bhuul ga.e
bujh ga.i sham-e-junun luT ga.i bazm-e-yaran
ahl-e-dil sozish-e-jan hoti hai kya bhuul ga.e
aisa viran hua ka.aba-e-hasti ya-rab
rah ga.e haath uThe harf-e-dua bhuul ga.e
husn sarshari-e-andaz-o-ada se guzra
aur sab ahl-e-vafa rasm-e-vafa bhuul ga.e
kam-ayari ne ḳhuda-soz banaya aisa
but to sab yaad rahe ek ḳhuda bhuul ga.e
kaun soche bhala kyuun dil nahin paband-e-namaz
jab sar-e-sham azanon ki sada bhuul ga.e
shahr janan men nahin puchhne vaala koi
kaun ho aa.e ho kyuun tum yahan kya bhuul ga.e
ḳhub! ‘sarvar’ tumhen ummid-e-karam yaad rahi
kya sitam hai ki gunahon ki saza bhuul ga.e
Leave a Reply