Gulshan Mein Ye Kamal Tujhe Dekh Kar Hua

gulshan meñ ye kamāl tujhe dekh kar huā

phūloñ kā rañg laal tujhe dekh kar huā

muddat ke ba.ad aaj mile haiñ to jān-e-man

dil ko bahut malāl tujhe dekh kar huā

aao ham aaj chāñd kā qarzā utaar deñ

tāroñ ko ye ḳhayāl tujhe dekh kar huā

ḳhushbū se kis zabān meñ bāteñ kareñge log

mahfil meñ ye savāl tujhe dekh kar huā

ashkoñ se jab likheñge ġhazal tab sunā.eñge

is dil kā jo bhī haal tujhe dekh kar huā

Leave a Comment