gulshan men ye kamal tujhe dekh kar hua
phulon ka rang laal tujhe dekh kar hua
muddat ke ba.ad aaj mile hain to jan-e-man
dil ko bahut malal tujhe dekh kar hua
aao ham aaj chand ka qarza utaar den
taron ko ye ḳhayal tujhe dekh kar hua
ḳhushbu se kis zaban men baten karenge log
mahfil men ye saval tujhe dekh kar hua
ashkon se jab likhenge ghazal tab suna.enge
is dil ka jo bhi haal tujhe dekh kar hua
Leave a Reply