gae zamane ki surat badan churae vo
nai ruton ki tarah se bhi muskurae vo
hazar meri nafi bhi kare vo mera hai
ki mere hone ka ehsas bhi dilae vo
har ek shaḳhs yahan apne dil ka malik hai
main laakh us ko bula.un magar na aae vo
hava ki ahaTen sunta huun dhaḌkanon ki tarah
misal-e-sham.a mujhe rat-bhar jagae vo
mire badan ko lahu-rang pairahan bhi de
miri qaba se mire zaḳhm bhi chhupae vo
miri ragon ka lahu bint-e-am se milta hai
main apna aap bhi dekhun to yaad aae vo
tamam raat guzari hai kirchiyan chunte
sahar hui to naya aaina dikhae vo
mira vajud kitabon men harf harf hua
ḳhuda kare miri avaz ban ke aae vo
vo ek sho.ala-e-javvala jo chhue jal jaae
magar ḳhud apne hi saae se ḳhauf khaae vo
ye kya ki mujh ko chhupaya hai meri nazron se
kabhi to mujh ko mire samne bhi laae vo
main apne aap se nikla to samne vo tha
aur ab ye soch raha huun kahin ko jaae vo
palaT chuka huun varaq zindagi ke ai ‘aḳhtar’
harim-e-shab men dabe paanv phir bhi aae vo
Leave a Reply