Habeeb Ahmad Siddiqui
ḳhizan-nasib ki hasrat ba-ru-e-kar na ho
bahar sho.abada-e-chashm-e-intizar na ho
fareb-ḳhurda-e-ulfat se puchhiye kya hai
vo ek ahd-e-mohabbat ki ustuvar na ho
nazar ko tab-e-nazara na dil ko jur.at-e-did
jamal-e-yar se yuun koi sharmsar na ho
qaba-darida-o-daman-o-astin ḳhunin
gulon ke bhes men ye koi dil-figar na ho
na ho sakega vo ramz-ashna-e-kaif-e-hayat
jo qalb chashm-e-taghaful ka razdar na ho
tariq-e-ishq pe hansti to hai ḳhirad lekin
ye gumrahi kahin manzil se ham-kanar na ho
na ta.ana-zan ho koi ahl-e-hosh maston par
ki zo.am-e-hosh bhi ik alam-e-ḳhumar na ho
vo kya bata.e ki kya shai umiid hoti hai
jise nasib kabhi sham-e-intizar na ho
ye chashm-e-lutf mubarak magar dil-e-nadan
payam-e-ishva-e-rangin sala-e-dar na ho
kisi ke lab pe jo aa.e naved-e-zist bane
vahi hadis-e-vafa jis pe e.atibar na ho
jo do-jahan bhi mange to main ne kya manga
vo kya talab jo ba-qadr-e-ata-e-yar na ho
Leave a Reply