Shahnaz Muzammil
ghubar-e-rah bani main rah-e-ghubar men huun
na jaane kaun hai main jis ke intizar men huun
vo mujh se milne palaT kar zarur aa.ega
bahut zamane se ummid ke hisar men huun
ye jabr-o-qadr ka chakkar azal se chalta hai
kabhi ye socha nahin kis ke iḳhtiyar men huun
ye log kaun hain kaise hain kuchh nahin ma.alum
main bas hujum ka hissa huun kis shumar men huun
mujhe bhi denge vo hissa ye kaise soch liya
main itni duur huun main kab khaḌi qatar men huun
main us ki huun vo mira hai bas itna kaafi hai
nahin hai jiit ki chahat main mast haar men huun
samajh ke bhi mujhe samjha nahin zamane ne
ḳhizan-rasida huun khoi magar bahar men huun
khaḌi huun ishq-samundar ke main kinare par
chaḌha hai ishq ka nashsha bahut ḳhumar men huun
Leave a Reply