Mukhtar Shameem
ḳhamoshiyon ke gahre samundar men Duub jaa.en
kho jaa.en is tarah ki phir apna pata na paa.en
hai maut ka payam kinaron ki zindagi
ma.asum machhliyon se kaho jaal men na aa.en
dasht-e-alam men barg-e-ḳhizan-dida ki tarah
bas ai hujum-e-shauq kahin ham bikhar na jaa.en
viraniyan ki ankhon men sahra basa hua
majburi-e-hayat na aansu bhi muskura.en
chehre jhulas rahe hain havadis ki dhuup men
phir bhi alam-nasib hazaron men jagmaga.en
aisa na ho ki dil ka har ik zaḳhm aanch de
kah dijiye ‘shamim’ vo meri ghazal na gaa.en
Leave a Reply