Dheerendra Singh Faiyaz
phir vahi shaḳhs mire ḳhvab men aaya hoga
niind men us ne hi ankhon ko rulaya hoga
is amavas men bhi mahtab uga hai ya.ani
us ne ungli se kahin chand banaya hoga
main hi ab us ko samajh sakta huun us ko main ne
yaad karte hue kis taur bhulaya hoga
ek muddat se huun tanha.i-shuda kam-az-kam
phir abhi kis ne mire dil ko dukhaya hoga
thak gaya hoga so dahshat men hain saare panchhi
asman jis ne ye kandhon pe uThaya hoga
vo ḳhushi tum ne mohabbat men ganva.i hogi
tum ne ye dukh bhi mohabbat men ganvaya hoga
muddaten ho ga.iin tanqid nahin karte log
kis ne a.inon ko a.ina dikhaya hoga
Leave a Reply