Poet
dilon men habs ka aalam purani adaton se hai
labon par talḳhiyon ka zahar bigḌe za.iqon se hai
jo ujḌa shahar ḳhvabon ka to apni bhi uḌi hai gard
kisi sukhe hue dariya ki surat muddaton se hai
ye kaali raat ka dariya baha kar le gaya suraj
hirasan sub.h ke sahil pe dil tarikiyon se hai
mahakte phuul bhi Dasne lage hain saanp ki surat
faza baghon ke andar bhi dilon ke mausamon se hai
unhin lamhon ki aahaT se milin bedariyan mujh ko
mire dariya ki jaulani samay ke paniyon se hai
vo aanch aane lagi ḳhud se ki dil Darne laga apna
jahannum ruuh ka bhaḌka hua ḳhamoshiyon se hai
khulin ankhen to sil nuur men Duuba hua paaya
mire suraj ki tabani nazar ke shobadon se hai
‘nadim’ is raah men sadiyon ki divaren bhi haa.il hain
na.i duniya abhi tak oT men in zulmaton se hai
Leave a Reply