ye alag baat ki chalte rahe sab se aage
varna dekha hi nahin teri talab se aage
ye mohabbat hai ise dekh tamasha na bana
mujh se milna hai to mil hadd-e-adab se aage
ye ajab shahr hai kya qahr hai ai dil mere
sochta koi nahin ḳhvab-e-tarab se aage
ab na.e dard pas-e-ashk-e-ravan jagte hain
ham ki rote the kisi aur sabab se aage
‘shaz’ yuun hai ki koi pal bhi fusun-kar nahin
dhyan aate the mire dil men ajab se aage
Leave a Reply