gham-e-dil ka bayan chhoḌ ga.e
ham ye apna nishan chhoḌ ga.e
tiri dahshat se baagh men sayyad
murgh sab ashiyan chhoḌ ga.e
raah men mujh ko ham-rahan mere
jaan ko na-tavan chhoḌ ga.e
nafrat aa.i sag-o-huma ko kya
jo mire ustuḳhvan chhoḌ ga.e
chalte chalte bhi ye jafa-keshan
haath mujh par nidan chhoḌ ga.e
kisi dar par unhon ko ja na mili
jo tira astan chhoḌ ga.e
safar is dil se kar ga.e gham-o-dard
yaar suuna makan chhoḌ ga.e
saf.ha-e-rozgar par likh likh
ishq ki dastan chhoḌ ga.e
le ga.e sab badan zamin men ham
‘mus.hafi’ ik zaban chhoḌ ga.e
Leave a Reply