Ek Guman Ka Haal Hai Aur Faqat Guman Mein Hai

ek guman ka haal hai aur faqat guman men hai

kis ne azab-e-jan saha kaun azab-e-jan men hai

lamha-ba-lamha dam-ba-dam an-ba-an ram-ba-ram

main bhi guzishtagan men huun tu bhi guzishtagan men hai

adam-o-zat-o-kibriya karb men hain juda juda

kya kahun un ka majra jo bhi hai imtihan men hai

shakh se ud gaya parind hai dil-e-sham-e-dard-mand

sahn men hai malal sa huzn sa asman men hai

khud men bhi be-aman huun main tujh men bhi be-aman huun main

kaun sahega us ka gham vo jo miri amaan men hai

kaisa hisab kya hisab halat-e-hal hai azaab

zakhm nafas nafas men hai zahr zaman zaman men hai

us ka firaq bhi ziyan us ka visal bhi ziyan

ek ajiib kashmakash halqa-e-be-dilan men hai

bud-o-nabud ka hisab main nahin janta magar

saare vajud ki nahin mere adam ki haan men hai