Zabanen Chup Rahen Lekin Mizaj-E-Yar Bolega

Shayan Quraishi

zabanen chup rahen lekin mizaj-e-yar bolega

ki tu ba-zarf hai kitna tira kirdar bolega

na.i naslon ko kis ne kya diya hai dekhiye lekin

mire ash.ar men tahzib ka me.aar bolega

vo jis ne khaa.e hain dhoke mohabbat kar ke apnon se

vahi to ḳhuun ko paani gulon ko ḳhaar bolega

jahan sach baat kahne ka ho matlab jaan se jaana

usi mahfil men bas apna dil-e-ḳhuddar bolega

vahan a.amal ko apne koi jhuTla na pa.ega

ki ye hissa badan ka jab sar-e-darbar bolega

koi maane na maane par mohabbat hi haqiqat hai

abhi main kah raha huun kal yahi aḳhbar bolega

agar ḳhamosh kar bhi di zaban rasm-e-mohabbat men

sar-e-mahfil magar ‘shayan’ ka kirdar bolega