Saqi-Nama

hua khema-zan karvan-e-bahar

iram ban gaya daman-e-koh-sar

gul o nargis o sosan o nastaran

shahid-e-azal lala-khunin kafan

jahan chhup gaya parda-e-rang men

lahu ki hai gardish rag-e-sang men

faza niili niili hava men surur

thaharte nahin ashiyan men tuyur

vo ju-e-kohistan uchakti hui

atakti lachakti sarakti hui

uchhalti phisalti sambhalti hui

bade pech kha kar nikalti hui

ruke jab to sil chiir deti hai ye

pahadon ke dil chiir deti hai ye

zara dekh ai saqi-e-lala-fam

sunati hai ye zindagi ka payam

pila de mujhe vo mai-e-parda-soz

ki aati nahin fasl-e-gul roz roz

vo mai jis se raushan zamir-e-hayat

vo mai jis se hai masti-e-kaenat

vo mai jis men hai soz-o-saz-e-azal

vo mai jis se khulta hai raz-e-azal

utha saqiya parda is raaz se

lada de mamule ko shahbaz se

zamane ke andaz badle gae

naya raag hai saaz badle gae

hua is tarah faash raz-e-farang

ki hairat men hai shisha-baz-e-farang

purani siyasat-gari khvar hai

zamin miir o sultan se be-zar hai

gaya daur-e-sarmaya-dar gaya

tamasha dikha kar madari gaya

giran khvab chini sambhalne lage

himala ke chashme ubalne lage

dil-e-tur-e-sina-o-faran do-nim

tajalli ka phir muntazir hai kalim

musalman hai tauhid men garam-josh

magar dil abhi tak hai zunnar-posh

tamaddun tasavvuf shariat-e-kalam

butan-e-ajam ke pujari tamam

haqiqat khurafat men kho gai

ye ummat rivayat men kho gai

lubhata hai dil ko kalam-e-khatib

magar lazzat-e-shauq se be-nasib

bayan is ka mantiq se suljha hua

lughat ke bakhedon men uljha hua

vo suufi ki tha khidmat-e-haq men mard

mohabbat men yakta hamiyat men fard

ajam ke khayalat men kho gaya

ye salik maqamat men kho gaya

bujhi ishq ki aag andher hai

musalman nahin raakh ka Dher hai

sharab-e-kuhan phir pila saqiya

vahi jaam gardish men la saqiya

mujhe ishq ke par laga kar uda

miri khaak jugnu bana kar uda

khirad ko ghulami se azad kar

javanon ko piron ka ustad kar

hari shakh-e-millat tire nam se hai

nafas is badan men tire dam se hai

tadapne phadakne ki taufiq de

dil-e-murtaza soz-e-siddiq de

jigar se vahi tiir phir paar kar

tamanna ko sinon men bedar kar

tire asmanon ke taron ki khair

zaminon ke shab zinda-daron ki khair

javanon ko soz-e-jigar bakhsh de

mira ishq meri nazar bakhsh de

miri naav girdab se paar kar

ye sabit hai to is ko sayyar kar

bta mujh ko asrar-e-marg-o-hayat

ki teri nigahon men hai kaenat

mire dida-e-tar ki be-khvabiyan

mire dil ki poshida betabiyan

mire nala-e-nim-shab ka niyaz

miri khalvat o anjuman ka gudaz

umangen miri arzuen miri

ummiden miri justujuen miri

miri fitrat aina-e-rozgar

ghazalan-e-afkar ka murgh-zar

mira dil miri razm-gah-e-hayat

gumanon ke lashkar yaqin ka sabat

yahi kuchh hai saaqi mata-e-faqir

isi se faqiri men huun main amiir

mire qafile men luta de ise

luta de thikane laga de ise

dama-dam ravan hai yam-e-zindagi

har ik shai se paida ram-e-zindagi

isi se hui hai badan ki numud

ki shole men poshida hai mauj-e-dud

giran garche hai sohbat-e-ab-o-gil

khush aai ise mehnat-e-ab-o-gil

ye sabit bhi hai aur sayyar bhi

anasir ke phandon se be-zar bhi

ye vahdat hai kasrat men har dam asiir

magar har kahin be-chugon be-nazir

ye aalam ye but-khana-e-shash-jihat

isi ne tarasha hai ye somnat

pasand is ko takrar ki khu nahin

ki tu main nahin aur main tu nahin

man o tu se hai anjuman-afrin

magar ain-e-mahfil men khalvat-nashin

chamak us ki bijli men taare men hai

ye chandi men sone men paare men hai

usi ke bayaban usi ke babul

usi ke hain kante usi ke hain phuul

kahin us ki taqat se kohsar chuur

kahin us ke phande men jibrail o huur

kahin jaza hai shahin simab rang

lahu se chakoron ke aluda chang

kabutar kahin ashiyane se duur

phadakta hua jaal men na-subur

fareb-e-nazar hai sukun o sabat

tadapta hai har zarra-e-kaenat

thaharta nahin karvan-e-vajud

ki har lahz hai taaza shan-e-vajud

samajhta hai tu raaz hai zindagi

faqat zuaq-e-parvaz hai zindagi

bahut us ne dekhe hain past o buland

safar us ko manzil se badh kar pasand

safar zindagi ke liye barg o saaz

safar hai haqiqat hazar hai majaz

ulajh kar sulajhne men lazzat use

tadapne phadakne men rahat use

hua jab use samna maut ka

kathin tha bada thamna maut ka

utar kar jahan-e-makafat men

rahi zindagi maut ki ghaat men

mazaq-e-dui se bani zauj zauj

uthi dasht o kohsar se fauj fauj

gul is shakh se tutte bhi rahe

isi shakh se phutte bhi rahe

samajhte hain nadan use be-sabat

ubharta hai mit mit ke naqsh-e-hayat

badi tez jaulan badi zud-ras

azal se abad tak ram-e-yak-nafs

zamana ki zanjir-e-ayyam hai

damon ke ulat-pher ka naam hai

ye mauj-e-nafs kya hai talvar hai

khudi kya hai talvar ki dhaar hai

khudi kya hai raz-darun-hayat

khudi kya hai bedari-e-kaenat

khudi jalva badmast o khalvat-pasand

samundar hai ik buund paani men band

andhere ujale men hai tabnak

man o tu men paida man o tu se paak

azal us ke pichhe abad samne

na had us ke pichhe na had samne

zamane ke dariya men bahti hui

sitam us ki maujon ke sahti hui

tajassus ki rahen badalti hui

dama-dam nigahen badalti hui

subuk us ke hathon men sang-e-giran

pahad us ki zarbon se reg-e-ravan

safar us ka anjam o aghaz hai

yahi us ki taqvim ka raaz hai

kiran chand men hai sharar sang men

ye be-rang hai Duub kar rang men

ise vasta kya kam-o-besh se

nasheb o faraz o pas-o-pesh se

azal se hai ye kashmakash men asiir

hui khak-e-adam men surat-pazir

khudi ka nasheman tire dil men hai

falak jis tarah aankh ke til men hai

khudi ke nigah-ban ko hai zahr-nab

vo naan jis se jaati rahe us ki aab

vahi naan hai us ke liye arjumand

rahe jis se duniya men gardan buland

khudi fal-e-mahmud se darguzar

khudi par nigah rakh ayazi na kar

vahi sajda hai laiq-e-ehtimam

ki ho jis se har sajda tujh par haram

ye aalam ye hangama-e-rang-o-saut

ye aalam ki hai zer-e-farman-e-maut

ye aalam ye but-khana-e-chashm-o-gosh

jahan zindagi hai faqat khurd o nosh

khudi ki ye hai manzil-e-avvalin

musafir ye tera nasheman nahin

tiri aag is khak-dan se nahin

jahan tujh se hai tu jahan se nahin

badhe ja ye koh-e-giran tod kar

tilism-e-zaman-o-makan tod kar

khudi sher-e-maula jahan us ka said

zamin us ki said asman us ka said

jahan aur bhi hain abhi be-numud

ki khali nahin hai zamir-e-vajud

har ik muntazir teri yalghar ka

tiri shaukhi-e-fikr-o-kirdar ka

ye hai maqsad gardish-e-rozgar

ki teri khudi tujh pe ho ashkar

tu hai fatah-e-alam-e-khub-o-zisht

tujhe kya bata.un tiri sarnavisht

haqiqat pe hai jama-e-harf-e-tang

haqiqat hai aina-e-guftar-e-zang

farozan hai siine men sham-e-nafas

magar tab-e-guftar rakhti hai bas

agar yak-sar-e-mu-e-bartar param

farogh-e-tajalli ba-sozad param

Leave a Comment