Jo Hamare Safar Ka Qissa Hai

Saba Akbarabadi

jo hamare safar ka qissa hai

vo tiri rahguzar ka qissa hai

sub.h tak ḳhatm ho hi ja.ega

zindagi raat bhar ka qissa hai

dil ki baten zaban pe kyuun laao

ghar men rahne do ghar ka qissa hai

koi talvar kya bata.egi

dosh ka aur sar ka qissa hai

hosh aa jaa.e to suna.unga

chashm-e-divana-gar ka qissa hai

chalte rahna to koi baat na thi

sirf samt-e-safar ka qissa hai

jite-ji ḳhatm ho nahin sakta

zindagi umr bhar ka qissa hai

shaam ko ham suna.enge tum ko

shab-e-gham ki sahar ka qissa hai

tere naqsh-e-qadam ki baat nahin

sirf shams o qamar ka qissa hai

daman-e-ḳhushk laao phir sunna

ye miri chashm-e-tar ka qissa hai

chand tinke na the nasheman ke

bagh-o-shaḳh-o-shajar ka qissa hai

halq men chubh rahe hain kanTe se

lab pe gul-ha-e-tar ka qissa hai

meri barbadiyon ka haal na puchh

ek nichi nazar ka qissa hai

usi bedad-gar se kah de ‘saba’

usi bedad-gar ka qissa hai