bichhaḌ ke un se mile to ka.i saval hue
bahut dinon se mo.attal the kab bahal hue
vo ek chehra jo kal se nazar nahin aaya
hamen laga ke use dekhe kitne saal hue
badan ko dasht banaya hai is liye ham ne
jo dil men aa.e the mashuq sab ghazal hue
hamare paas jise DhunDhte ho tum aa kar
zamana biit ga.e us ka intiqal hue
hamesha logon ko davat pe tum bulate ho
batao in men se kitne namak-halal hue
hamen tum ishq ke adab mat sikhaya karo
isi ḳharabe men apne safed baal hue
kisi ke ishq men dil ḳhuun ḳhuun hai ‘dilbar’
hamare ansuon ke rang ab to la.al hue
Leave a Reply