daur-e-charḳh-e-kabud jaari hai
jism-o-jan par jumud taari hai
goya insan nahin hayula huun
meri rag rag men duud saari hai
maut ham-sa.e men hui hai to kya
bazm-e-raqs-e-surur jaari hai
doston se vo kya karenge suluk
jin par apna vajud bhari hai
hai tasavvur men ik ruḳh-e-raushan
aur lab par darud jaari hai
umr bhar khul saki na dil ki girah
ḳhuub shaghl-e-kushud-kari hai
bhar na pa.ega zaḳhm-e-dil ‘sahir’
zarb-e-harf-e-husud kaari hai
Leave a Reply