ada-e-tul-e-sukhan kya vo ikhtiyar kare
jo arz-e-hal ba-tarz-e-nigah-e-yar kare
bahut hi talkh-nava huun magar aziz-e-vatan
main kya karun jo tira dard be-qarar kare
qadam ko faiz-e-junun se vo hausla hai nasib
jo khar-e-rah ko bhi sham-e-rahguzar kare
jagaen ham-safaron ko uthaen parcham-e-shauq
na jaane kab ho sahar kaun intizar kare
misal milti hai kitnon ki us divane se
chaman se duur jo baitha gham-e-bahar kare
dayar-e-jaur men rasta hai ik yahi varna
kise pasand hai ai dil ki sair-dar kare
khuda kare gham-e-giti ka pech-o-tab ai dost
kuchh aur bhi tiri zulfon ko tabdar kare
sitam ki tegh-e-qalam den use jo ai ‘majruh’
ghazal ko qatl kare naghme ko shikar kare